Á döfinni
Viðburðir
Félag kvenna í atvinnulífinu í Danmörku hefur haldið fjölda viðburða, þar sem færri komast að en vilja. Eðli viðburðanna er með ýmsu móti; fyrirlestrar, námskeið, fyrirtækjaheimsóknir og fleira. Bæði utanaðkomandi fyrirlesarar og félagskonur hafa leitt fundina og reynir félagið eftir fremsta megni að bjóða upp á fjölbreytta viðburði.
Sumargleði 2026: Búbblur & Bylgjur
Sumargleðin okkar er loksins á næsta leiti. Þetta er án efa einn af vinsælustu viðburðum ársins hjá félaginu og því borgar sig að hafa hraðar hendur.
Dagskráin
Við hittumst fyrir framan The Standard (Havnegade 44, Kbh K) kl. 17 og byrjum kvöldið á freyðandi fjöri og siglingu um fallegu síkin í Kaupmannahöfn. Við siglum af stað kl. 17.30 og með búbblur í glasi og góða skapið í farteskinu ætlum við að njóta samverunnar og skemmta okkur undir dásamlegri veislustjórn Ástu Stefánsdóttur.
Að siglingu lokinni höldum við leiknum áfram og færum okkur yfir í Kongens Have. Þar ætlum við að njóta þess að styrkja tengslin, hlæja og eiga góða stund saman.
Gott að vita:
Mætið með ykkar eigið teppi, glas og góða skapið.
Matur og drykkir eru innifaldir í verðinu.
Við gæðum okkur á gómsætum borgurum frá Burger Joint. Pöntunarform fyrir matinn verður sent út þegar að nær dregur.
Tryggðu þér sæti strax! Þessi viðburður er hápunktur sumarsins hjá FKA-DK og við hlökkum mikið til að sjá ykkur allar í eintómri gleði og glensi.
Nýsköpun & Nýir skór!
Nýsköpun & Nýir skór!
JBT Marel býður FKA‑DK konum í heimsókn 30. apríl, þar sem Erla Hendriksdóttir frá JoDis Shoes verður sérstakur gestur. Við ræðum breytingastjórnun, nýsköpun og nýja skó og höfum góðan tíma til tengslamyndunar í notalegu umhverfi.
JBT Marel – vegferðin að nýrri ímynd
JBT Marel hefur gengið í gegnum umfangsmiklar breytingar á síðustu misserum. Margar þekkja vel hvernig breytingar hafa áhrif á starfsumhverfi og teymi. Helena Guðrún Bjarnadóttir, Director Marketing, Events and Demo Centers, mun fara yfir vegferðina að nýrri ímynd fyrirtækisins.
JoDis – íslensk hönnun, portúgalskt handverk
Erla Hendriksdóttir, annar eigenda og stofnenda JoDis Shoes, mun sýna frá hönnunarferlinu og framleiðslunni í Portúgal og því hvernig það er að reka skóhönnunarfyrirtæki. Gestir geta skoðað og mátað skó og jafnvel lagt inn pöntun. Sérstakur FKA‑DK afsláttur verður í boði þetta kvöld.
Alþjóðlegur baráttudagur kvenna
Alþjóðlegur baráttudagur kvenna verður haldinn hátíðlegur í Jónshúsi föstudaginn 6. mars nk.
Líkt og undanfarin ár verður viðburðurinn haldinn hátíðlegur í samstarfi við kvennakórinn Eyju.
Gestafyrirlesarar að þessu sinni eru Elinóra Guðmundsdóttir stofnandi og ritstýra útgáfufyrirtæksisins Via og ein þriggja ritstjóra bókarinnar Hennar rödd og Kaja Sigvalda ljósmyndari bókarinnar. Þær munu segja frá gerð bókarinnar og útgáfu, ljósmyndaferlinu og ræða kvenréttindabaráttuna, inngildingu og það að vera af erlendum uppruna.
Þá er gaman að segja frá því að Hennar Rödd er tilnefnd til Íslensku bókmenntaverðlaunanna, Fjöruverðlaunanna og vann um daginn Íslensku bókahönnunarverðlaunin í flokki heildarhönnun bóka. Þær ætla einnig að vera með örfáar bækur til sölu á viðburðinum, á 600 kr.
Kvennakórinn Eyja mun sjá um veitingar og hægt verður að kaupa bæði mat og drykkjarföng til styrktar kórastarfi þeirra.
Stefnt er að halda svo fjörinu áfram í góðu glensi að viðburði loknum, enda mikilvægt að styrkja tengslanetið og hafa gaman saman.
Hlökkum til að sjá ykkur!
Fyrirtækjaheimsókn til Pandora
Komdu í heimsókn í Pandora
Pandora býður, í samstarfi við FKA-DK og Kötlu Nordic, til spennandi kynningar á starfsemi stærsta skartgripafyrirtæki heims. Farið verður yfir hvernig fyrirtækið vinnur að helstu verkefnum og áherslum.
Boðið verður upp á léttar veitingar.
Kynnar kvöldsins verða:
Guðný Lára Árnadóttir - Global PR Event & Activation
Guðrún Jóna Jónsdóttir - Director, Engineering
Guðrún Reynisdóttir - Manager, Product Management
ATH! Takmarkaður miðafjöldi
Glitrandi aðventugleði
Við hlökkum til að sjá ykkur í huggulegu umhverfi og notalegri stemningu.
Online Kynningarfundur: Mentorverkefni FKA-DK
Vilt þú vita meira um Mentorverkefni FKA-DK?
Taktu þátt í stuttum online kynningarfundi þar sem Laufey Kristín Skúladóttir, verkefnastýra og konan á bakvið Mentorverkefni FKA-DK, segir frá hugmyndinni að baki verkefninu, markmiðunum og hvernig ferlið gengur fyrir sig.
Tengslamyndun FKA-DK og FKA-Atvinnurekenda Auðs
Tengsl skapa tækifæri!
Á þessum viðburði gefst einstakt tækifæri til að styrkja tengslin við íslenskar konur í atvinnurekstri á Íslandi.
Atvinnurekenda AUÐUR er félag innan FKA sem er sérstaklega ætlað konum sem eiga og reka fyrirtæki. Félagið skapar vettvang þar sem konur í atvinnurekstri geta vaxið, eflt tengslanet sitt og fengið stuðning við að takast á við áskoranir sem mæta þeim sem fyrirtækjaeigendum.
Aðgangur er ókeypis en hægt verður að kaupa drykki á barnum.
Fulltrúar FKA-DK og Atvinnurekenda Auðs munu stýra tengslamyndun.
Allar velkomnar!
Vilt þú halda erindi eða ert þú með tillögu að erindi?