Dóra er tölvunarfræðingur og starfar sem Head of Digital Udvikling & QualityAssurance hjá Akademiker Pension

Dóra hefur víðtæka reynslu af stjórnun og innleiðingu nýrra ferla, sérstaklega á sviði gæðastjórnunar í stafrænni þróun.

Hún starfar í dag sem Head of Digital Udvikling og Quality Assurance hjá AkademikerPension, dönskum lífeyrissjóði sem er leiðandi í grænum fjárfestingum og hefur um 200.000 meðlimi. Hjá AkademikerPension leiðir Dóra umfangsmikið verkefni þar sem verið er að innleiða nýtt kjarnakerfi. Hún er ábyrg fyrir upbyggingu og að efla ferla sem tengjast stafrænni þróun og tryggja há gæðaviðmið.

Dóra tók við starfinu í desember 2024 eftir margra ára starfsferil hjá Netcompany, einu stærsta fyrirtæki Norður-Evrópu á sviði stafrænna lausna. Þar gegndi hún lykilhlutverki sem yfirmaður prófana og gæðaeftirlits, stýrði stórri deild með hundruðum starfsmanna og hafði jafnframt umsjón með endurmenntun innan fyrirtækisins. Árið 2022 var Dóra útnefnd Principal hjá Netcompany, titill sem aðeins um 120 starfsmenn báru á þeim tíma, þar af einungis tíu konur. Dóra sýndi þar bæði frumkvæði og seiglu í að efla stöðu kvenna innan fyrirtækisins og varð öðrum konum í tækniheiminum mikil fyrirmynd og hvatning.

Herdís er vinnumarkaðshagfræðingur og starfar sem dósent við Copenhagen Business School (CBS).

Rannsóknir hennar snúa að samfélagslega mikilvægum viðfangsefnum á borð við kynjajafnrétti, fjölskyldutengsl, menntun og heilbrigði. Hún hefur sérstaklega vakið athygli fyrir rannsóknir á samspili atvinnu- og fjölskyldulífs, og hlaut nýlega veglegan rannsóknarstyrk til að kanna verkaskiptingu foreldra á Íslandi og í Danmörku.

Herdís er virkur þátttakandi í alþjóðlegu fræðasamfélagi og heldur reglulega fyrirlestra í háskólum og á ráðstefnum víða um heim. Herdís á einnig sæti í peningastefnunefnd Seðlabanka Íslands.

Auk fræðastarfa hefur Herdís lagt sitt af mörkum til nýsköpunar í námi og kennslu og kom meðal annars að þróun og hönnun nýs meistaranáms í Farsældarfræðum.

Árið 2023 hlaut hún verðlaun Jóns Sigurðssonar fyrir framúrskarandi rannsóknir á sviði vinnumarkaðsfræði, sem hafa haft verulegt samfélagslegt gildi bæði á Íslandi og í Danmörku.

Framlag Herdísar til jafnréttismála og skilnings á breytilegum aðstæðum ólíkra hópa á vinnumarkaði hefur verið afar mikilvægt. Rannsóknir hennar gefa dýrmæta innsýn í þær áskoranir sem einstaklingar og fjölskyldur standa frammi fyrir í síbreytilegu efnahags- og samfélagsumhverfi nútímans.

Vigdís er stofnandi og eigandi Boutiqe Fisk og starfar jafnframt sem verkefnastjóri hjá Kaupmannahafnarkommúnu.

Vigdís hefur verið búsett í Danmörku í rúma tvo áratugi og hefur á þeim tíma skapað sér sterka stöðu í dönsku atvinnulífi.

Árið 2007 stofnaði Vigdís Boutique Fisk, með þá einföldu sýn að kenna Dönum að borða fisk. Fyrirtækið hefur vaxið jafnt og þétt og notið mikillar velgengni. Í dag rekur Boutique Fisk verslanir í Torvehallerne og Magasin, tveimur af vinsælustu og virtustu verslunarstöðum Kaupmannahafnar.

Frá 2014-2022 stofnaði hún og rak einnig kaffihúsakeðjuna Retreat sem m.a. voru staðsettar á Kastrup flugvelli og Magasin.

Samhliða rekstri Boutique Fisk og Retreat hefur Vigdís undanfarin ár starfað sem verkefnastjóri hjá Kaupmannahafnar­kommúnu, þar sem hún hefur leitt umfangsmikið samfélagsverkefni, „Flere børn i fællesskaber”, í samstarfi við Red Barnet, DGI og Mødrehjælpen. Verkefnið miðar að því að efla þátttöku barna og fjölskyldna í samfélaginu og stuðla að jöfnum tækifærum til virkni og velferðar.

Í gegnum bæði frumkvöðlastarf og samfélagsverkefni hefur Vigdís sýnt drifkraft, þrautseigju og áræðni og verið frábær fyrirmynd fyrir aðra Íslendinga dönsku atvinnulífi.