Tengsl skapa tækifæri

Tengsl skapa tækifæri – skemmtilegur og vellukkaður tengslamyndunarviðburður í Kaupmannahöfn

Félag kvenna í atvinnulífinu í Danmörku bauð félagskonum FKA og FKA-Auðs til tengslamyndunar undir yfirskriftinni „Tengsl skapa tækifæri“. Hátt í 80 konur úr íslensku og dönsku atvinnulífi sóttu viðburðinn, sem fram fór í Kaupmannahöfn laugardaginn 20. september sl. Markmið viðburðarins var að efla tengslanet kvenna, skapa vettvang fyrir fagleg samskipti og styrkja tækifæri til frekara samstarfs. Jórunn Einarsdóttir formaður FKA-DK bauð gesti velkomna og Helena Guðrún Bjarnadóttir stjórnarkona stýrði mjög skemmtilegum tengslamyndunarleik þar sem hópar áttu að markaðsetja hinar ýmsu óseljanlegu vörur líkt og t.d. vekjaraklukku sem hringir handahófskennt að nóttu og broddakodda, og vakti mikinn hlátur og gleði að hlusta á söluræður allra hópanna. Gestirnir frá Íslandi efndu svo til happadrættis sem Jónína Bjartmarz sem fór fyrir hópnum stýrði þar sem í verðlaun voru glæsilegar vörur frá fyrirtækjum félagskvenna í hópnum.
Viðburðurinn þótti afar vel hepnaður og andrúmsloftið var fullt af orku, gleði og samstöðu. 

Fyrir viðburðinn höfðu félagskonur FKA-Auðs fengið einstakt tækifæri til að kynnast íslensku samfélagi og menningu í Kaupmannahöfn. Þær þekktust boð Péturs Ásgeirssonar sendiherra Íslands í Kaupmannahöfn, Höllu Benediktsdóttur forstöðukonu Jónshúss og Rögnu Söru Jónsdóttur í FÓLK. Einnig nutu þær leiðsagnar Ástu Stefánsdóttur, eiganda Ferða um Kaupmannahöfn, sem tók hópinn í lifandi gönguferð um borgina þar sem saga, arkitektúr og menning voru í forgrunni. Þá opnaði skartgripahönnuðurinn Sif Jakobs dyrnar að verslun sinni þar sem Sandra Gunnarsdóttir yfirhönnuður sagði frá vegferð fyrirtækisins á alþjóðlegum markaði.

Takk fyrir komuna og eftirminnilegan dag kæru konur í FKA og FKA - Auði.

Myndasyrpa: Salka Ísfeld Mirrudóttir